இந்தியத் தமிழர்களை பிச்சைக்காரர்போல் நடத்துகிறார் மகிந்த: தொண்டமான் குற்றச்சாட்டு!

இலங்கையில் உள்ள இந்திய வம்சாவழித் தமிழர்களான மலையகத் தமிழர்களை பிச்சைக்காரர்களைப் போல் சிறிலங்கா அரச தலைவர் மகிந்த ராஜபக்ச நடத்துவதாக மகிந்தவின் அமைச்சரவையில் இடம்பெற்றுள்ள இளைஞர் மேம்பாட்டுத் துறை அமைச்சர் ஆறுமுகம் தொண்டமான் குற்றம்சாட்டியுள்ளார்.


அரச தலைவராக சந்திரிகா குமாரதுங்க பொறுப்பில் இருந்த போது ஏற்படுத்தப்பட்ட உடன்பாட்டின்படி மலையக பாடசாலைகளில் 300 ஆசிரியர்களை நியமனம் செய்து அதற்கான நியமன ஆணைகள் வழங்கும் நிகழ்வு மகிந்தவின் அலரி மாளிகையில் கடந்த வியாழக்கிழமை நடைபெற்றது.

இந்நிகழ்வு நடைபெறுவது குறித்து புதன்கிழமைதான் ஆறுமுகம் தொண்டமானுக்குத் தெரிவிக்கப்பட்டது. ஆறுமுகம் தொண்டமான் தலைமையிலான இலங்கை தொழிலாளர் காங்கிரஸ் குழுவினர் உத்தியோகப்பூர்வமாக இந்தியப் பயணம் மேற்கொண்டிருந்தனர். புதுடில்லியில் இந்திய அதிகாரிகளுடனான சந்திப்புக்கும் வியாழக்கிழமை திட்டமிடப்பட்டிருந்த நிலையில் அவற்றை இரத்துச் செய்துவிட்டு புதன்கிழமை இரவே இலங்கைத் தொழிலாளர் காங்கிரசார் கொழும்பு திரும்பினர்.

இருப்பினும் இலங்கை தொழிலாளர் காங்கிரசின் அதிருப்தியாளர்களான பிரதி அமைச்சர்கள் சுரேஸ் வடிவேல் மற்றும் பைசர் முஸ்தாபா ஆகியோருக்கும் அழைப்பு அனுப்பி வைக்கப்பட்டதை கேள்விப்பட்ட இலங்கை தொழிலாளர் காங்கிரஸ் கடும் அதிருப்தியடைந்தனர்.

அதிருப்தியாளர்களை அழைத்தால் நிகழ்விலிருந்து தாங்கள் வெளிநடப்புச் செய்ய நேரிடும் என்றும் மகிந்த ராஜபக்ச அரசாங்கமானது தமது இனத்தவர்களையும் கட்சியையும் பிச்சைக்காரர்களைப் போல் நடத்துவதாகவும் ஆறுமுகம் தொண்டமான் தெரிவித்த குற்றச்சாட்டை மேல்மாகாண ஆளுநர் அலாவி மௌலானாவிடம் இலங்கை தொழிலாளர் காங்கிரஸ் தரப்பினர் தெரிவித்தனர். நிகழ்வை ஒத்திவைக்கலாம் என்று அலாவி மௌலானா பதிலளித்துள்ளார்.

ஆனால் நீண்டகாலமாக ஆசிரியர் நியமன ஆணைகள் வழங்கப்படாமல் இருந்த நிலையில் நிகழ்வை ஒத்திவைக்க விரும்பவில்லை என்று இலங்கை தொழிலாளர் காங்கிரசினர் கூறியுள்ளனர். இதையடுத்து அலரி மாளிகையில் நிகழ்ச்சி நடைபெற்றது.
நன்றி>புதினம்.