தமிழருக்காக கருணாநிதி, மகள் கனிமொழி உண்ணாவிரதம்.

இலங்கையில் தமிழர்கள் கொல்லப்படுவதை கண்டித்து தமிழ் பாதுகாப்பு இயக்கம் சார்பில் சென்னை வள்ளுவர் கோட்டம் முன்பு இன்று உண்ணாவிரதம் நடந்தது.
முதல்-அமைச்சர் கருணாநிதி மகளும், கவிஞருமான கனிமொழி தலைமை தாங்கினார். கவிஞர் வைரமுத்து உண்ணா விரதத்தை தொடங்கி வைத்தார். அப்போது அவர் பேசியதாவது:-

எழுத்தாளர்கள், கவிஞர்கள் வெறும் கனவு காண்பவர்கள் மட்டுமல்ல தமிழர்கள் வேதனைபட்டால் அவர்களுக்காக நாங்களும் வேதனைபடுவோம். இந்த உண்ணாவிரத போராட்டத்தை நான் தொடங்கி வைப்பதாக அறிவித்தார்கள். உண்மையில் நான் தொடங்கி வைக்க வில்லை.

5-6-1956-ம் ஆண்டு இலங்கை பாராளுமன்றம் முன்பு ஈழத்தமிழர்கள் உண்ணா விரதம் தொடங்கினார்கள். இலங்கையில் சிங்களம் ஆட்சி மொழி என்பதை கண்டித்து அப்போது போராட்டத்தை தொடங்கினார்கள். ஒரு இனத்தை அழிக்க வேண்டும் என்றால் அவர்களின் தாய்மொழியை முதலில் அழியுங்கள் என்பார்கள். அது போல்தான் தமிழின படுகொலையை கண்டித்து முதலில் தாய்மொழி தமிழ் மீது தொடங்கியது.

1956-ல் தொடங்கிய போராட்டம் அன்று முதல் இன்று வரை அரை நூற்றாண்டு காலமாக எண்ணற்ற போராட்டங்கள் சிங்கள அரசுக்கு எதிராக நடந்து இருந்தது. அதில் இந்த போராட்டமும் ஒன்று. இதை நான், தொடங்கி வைக்கவில்லை. யாழ்ப்பாணம் வாகரையில் தமிழர்கள் பட்டினியால் மடிகிறார்கள் என்று சிங்கள அரசே அறிவித்துள்ளது.

இலங்கையில் ரத்த கம்பளத்தில் நடக்கும் ராஜபக்சே இந்தியா வந்துள்ளார். அவருக்கு ரத்தின கம்பள வரவேற்பு அளிக்கப்படுகிறது. இந்திய அரசை கேட்கிறேன். இது நியாயமாப இலங்கை அரசின் தலைவர் என்ற முறையில் ராஜபக்சேக்கு மரியாதை தரலாம். ஆனால் அந்த பதவிக்குரிய வேலையை அவர் செய்கிறாரா? செய்யவில்லையே எனவேதான் கண்டிக்கிறோம்.

இதுவரை 18,412 மாவீரர்கள் கொல்லப்பட்டு இருப்பதாக தமிழ் ஈழ போராட்டத்தலைவர் பிரபாகரன் தெரிவித்துள்ளார். யாழ்ப்பாணத்தில் மாவீரர்கள் கல்லறை மீது புல்டோசர்கள் வைத்து உழுகிறார்கள். கல்லறையில் புதைக்கப்படும் தமிழர்களின் சடலங்களை மீண்டும் தூக்கில் தொங்க விடுகிறார்கள். கல்லறையில் புதைக்கப்பட்டுள்ள மாவீரர் கள் விதைக்கப்பட்டுள்ளார்கள். தமிழினத்தை யாராலும் அழிக்க முடியாது.

இந்த போராட்டத்தை தொடங்கி வைத்ததற்காக ரத்த கண்ணீர் வடிக்கிறேன். ஈழத்தில் தமிழர்கள் கொல்லப்படுவதை தடுத்து நிறுத்த வேண்டும். யாழ்ப்பாண நெடுஞ்சாலையை திறந்துவிடவேண்டும். இலங்கை அரசிடம் கேள்வி கேட்கிறேன். அங்கு நடப்பது யுத்தமா? அல்லது இன படுகொலையா? எம்.பி.க்கள், எழுத்தாளர்கள், அப்பாவிகள் சுட்டுக்கொல்லப்படு கிறார்கள். இந்த சம்பவங்களுக்கு எந்த எப்.ஐ.ஆரும் இல்லை. அதுபற்றி கேட்டால் அடையாளம் தெரியாத துப்பாக்கியாளர்கள் கொல்லப்பட்டதாக அரசு சொல்கிறது. அந்த துப்பாக்கியாளர்கள் யார்? அவர்களுக்கு துப்பாகி கொடுத்தது யார்? இதற்கு பதில் சொல்லியே ஆகவேண்டும்.

வாடுகின்ற தமிழர்களில் ஈழத்தமிழர்களுக்காக முதல் குரல் கொடுத்தவர் கலைஞர்தான். அவர் அரசின் இறையாண்மைக்கு கட்டுப்பட்டு செயல்பட்டு வருகிறார். பூனை வாயில் சிக்கிய மீன் குழம்பாகாது. அது போல் இந்தியா வழங்கும் நிவாரண பொருட்களை சிங்கள அரசிடம் கொடுத்தால் தமிழர்களிடம் செல்லாது. ராஜபக்சேவின் பசப்பு வார்த்தைகளை நம்பி இந்தியா ஏமாந்துவிட வேண்டாம். தமிழர்கள் பாதுகாப்புடன் வாழ உடனடி நடவடிக்கை தேவை. மடிந்து வரும் தமிழர்களை காக்க தனி தமிழ், ஈழம் கிடைக்க வேண்டும்.

இவ்வாறு அவர் பேசினார்.

கவிஞர் கனிமொழி பேசியதாவது:-

அரசியல் கட்சிகள்தான் சமுதாய பிரச்சினைக்கு போராட வேண்டும் என்பதல்ல சமுதாயத்தின் மனசாட்சிகளாக விளங்கும் எழுத்தாளர்கள், படைப்பாளிகள், சிந்தனையாளர்கள், கவிஞர்களும் போராட வேண்டும்.

எனது இனம், எனது சமுதாயம் ஒதுக்கப்படும்போது நான் பார்த்துக்கொண்டு சும்மா இருக்க முடியாது. அப்படிப்பட்ட வாழ்க்கை தேவையில்லை. இலங்கையில் அரை நூற்றாண்டாக தமிழினம் அழிக்கப்பட்டு வருகிறது. அதை பார்த்து நாம் ஏன் பயந்து கொண்டிருக்க வேண்டும்.

ஜனநாயக நாட்டில் மக்களை பாதுகாப்பது அரசின் கடமை. ஆனால் அந்த அரசே கட்டவிழ்த்து விட்டுள்ள வன்முறையை கண்டித்துதான் இந்த போராட்டம் நடந்துள்ளது.

இவ்வாறு அவர் கூறினார்.

உண்ணாவிரத போராட்டத்தில் ரவிக்குமார் எம்.எல்.ஏ., கவிஞர் அறிவுமதி, ஞானக் கூத்தன், தயாரிப்பாளர் சங்க தலைவர் ராமநாராயணன், விஜயா தாயன்பன், முன்னாள் அமைச்சர் இந்திரகுமாரி, நடிகை ஸ்ரீபிரியா, சேப் பாக்கம் வி.சி.மணி உள்பட ஏராளமானோர் கலந்து கொண்டனர்.

நடிகர் சத்யராஜ் போராட்டத்திற்கு நேரில் வந்து வாழ்த்து தெரிவித்தார். மாலையில் திராவிட கழக தலைவர் கி.வீரமணி உண்ணாவிரதத்தை முடித்து வைக்கிறார்.

உண்ணாவிரத போராட்டத்தில் வெளியிடப்பட்ட கோரிக்கை வருமாறு:-

* யாழ்ப்பாண நெடுஞ்சாலையை உடனே திறக்க வேண்டும்.

* தமிழர்கள் மீதான பொருளாதார தடையை நீக்க வேண்டும்

* இந்தியா வழங்கும் உணவு பொருட்களை யாழ்ப்பாண தமிழர்களுக்கு நேரடியாக வழங்க வேண்டும்.

* தமிழர்கள் மீதான தாக்குதலை உடனே நிறுத்த இலங்கை அதிகாரியிடம் பிரதமர் வலியுறுத்த வேண்டும்.

* இலங்கை அரசோடு எந்த ராணுவஒப்பந்தமும் செய்யக்கூடாது.
நன்றி>லங்காசிறீ.