வான்புலிகள் தாக்குதல்: இந்திய தயாரிப்பு ராடார்கள் மீது குற்றம் சாட்டுகிறது சிறிலங்கா!!!

சிறிலங்காவுக்கு இந்திய அரசாங்கத்தால் உத்தியோகபூர்வமாக வழங்கப்பட்ட ராடார்களால் தமிழீழ விடுதலைப் புலிகளின் வானூர்திகளை அவதானிக்க முடியவில்லை என்று சிறிலங்கா குற்றம்சாட்டியுள்ளது.


கொழும்பிலிருந்து இன்று புதன்கிழமை வெளியான ஆங்கில ஊடகமான தி ஐலேண்ட் நாளிதழின் முதல் பக்கத்தில் அதன் செய்தியாளர் சமிந்த்ர பெர்னாண்டோ எழுதியுள்ளதாவது:

பண்டாரநாயக்க அனைத்துலக வான் நிலையத்துக்கு அருகாமை வரை வானூர்திகள் வந்ததை இந்தியாவால் வழங்கப்பட்டிருந்த ராடார்களால் அவதானிக்க முடியவில்லை. சிறிலங்கா வான் படையில் இணைக்கப்பட்டிருக்கும் இந்திய ராடார்களானவை இயங்குவதில் சிக்கல் உள்ளன. தாக்குதல் நேரத்தின் போது அது இயங்கவில்லை. அதே நேரத்தில் அனைத்துலக பயணிகள் வானூர்தி நிலையத்தில் உள்ள ராடாரானது ஊடுருவியோரை அவதானித்துள்ளது. அது மிகவும் தாமதமானது. ஏனெனில் அந்தத் தளத்திலிருது 3 கிலோ மீற்றர் தொலைவில் ஊடுருவல்காரர்கள் இருந்தனர்.

ஊடுருவியோரை சிறிலங்கா வான் படையின் ராடார் அவதானித்திருந்தால் திங்கட்கிழமை நிகழ்வானது வேறுவிதமாக இருந்திருக்கும் என்று பெயர் வெளியிட விரும்பாத அதிகாரி ஒருவர் தெரிவித்தார்.

இந்திய ராடார் இயங்காமல் போன விடயம் குறித்து கொழும்பில் உள்ள இந்தியத் தூதரகத்தின் கவனத்துக்கு சிறிலங்கா அரசாங்கம் கடந்த திங்கட்கிழமை கொண்டு சென்றுள்ளது.

முன்னாள் அரச தலைவர் சந்திரிகா குமாரதுங்க ஆட்சிக்காலத்தில் சீனாவிலிருந்து 3 டி உயர்ரக ராடார்களை கொள்வனவு செய்ய விரும்பினார். ஆனால் அப்போதைய சிறிலங்காவுக்கான இந்தியத் தூதுவர் நிருபமா ராவ் இவ்விடயத்தில் தலையிட்டு, கொழும்பின் பாதுகாப்புக்காக ராடார்களை வழங்குவோம் என்று தெரிவித்திருந்தார். சந்திரிகா குமாரதுங்கவும் வேறு வழியின்றி ஒப்புக்கொண்டார்.

இது விடயமாக தற்போதைய இந்தியத் தூதுவரான அலோக் பிரசாத்தை சந்தித்துப் பேச சிறிலங்கா அரச தலைவர் மகிந்த ராஜபக்ச முடிவு செய்துள்ளார் என்று அதில் கூறப்பட்டுள்ளது.
நன்றி>புதினம்.