சிறார்களைப் போர்ப்படையில் சேர்ப்பதில் இலங்கை அரசு, ஒட்டுக்குழுக்களுடன் இணைந்து செயற்படுவதாக ஹியூமன் ரைட்ஸ் வாட்ஜ் குற்றச்சாட்டு.

சிறார்களைப் போர்ப்படையில் பயன்படுத்துவதில் இலங்கை அரசாங்கம் ஒட்டுக்குழுக்களுடன் கைகோர்த்துச் செயற்படுவதாக சர்வதேச மனித உரிமைகள் அழுத்தக் குழுவான ஹியூமன் ரைட்ஸ் வாட்ஜ் குற்றஞ்சாட்டியுள்ளது.

விடுதலைப்புலிகள் அமைப்பில் இருந்து பிரிந்து செயற்படும் கருணா குழு, கிழக்கு மாகாணத்தில் அரசாங்கக் கட்டுப்பாட்டுப் பகுதிகளில், தண்டனை கிடைக்கும் என்ற பயம் எதுவும் இல்லாமல் சிறார்களையும், இளைஞர்களையும் தமது போர்ப்படையில் சேர்த்துவருவதாக அந்த அமைப்பு கூறுகிறது.

தாம் இணைந்து செயற்படுவதாகக் கூறப்படுவதை இலங்கை அரசும், கருணா அணியினரும் மறுத்துள்ளார்கள், அத்தோடு தமது அணியில் சிறார்கள் இருப்பதாகக் கூறப்படுவதை கருணா அணி மறுத்துள்ளது.

விடுதலைப்புலிகள் அமைப்பும் சிறார்களைத் தொடர்ந்தும் போர்ப்படைக்குச் சேர்ப்பதாகவும் ஹியூமன் ரைட்ஸ் வாட்ஜ் குற்றஞ்சாட்டியுள்ளது.
சிறார்களை படையில் சேர்க்க வேண்டிய அவசியம் எதுவும் தமது அணிக்குக் கிடையாது தமிழ் மக்கள் விடுதலைப்புலிகள் அமைப்பின் தலைவர் கருணா தமிழோசைக்குத் தெரிவித்துள்ளார்.

இது தொடர்பான குற்றச்சாட்டுகளை மறுத்துள்ள இலங்கை அரசாங்கத்தின் பாதுகாப்பு விவகாரங்கள் குறித்துப் பேசவல்ல அமைச்சர் கெகலிய ரம்புக் வெல்ல அவரகள், இந்தக் குற்றச்சாட்டுகள் குறித்து விசாரணைகள் நடத்தப்படும் என்றும் கூறியுள்ளார்.

இந்த விவகாரம் தொடர்பில் தமிழ் மக்கள் விடுதலைப்புலிகள் அமைப்பின் தலைவர் கருணா மற்றும் அமைச்சர் கெகலிய ரம்புக்வெல்ல ஆகியோரின் செவ்விகளை நேயர்கள் இன்றைய நிகழ்ச்சியில் கேட்கலாம்.
நன்றி>பிபிசி