'பயங்கரவாத தடைச் சட்டத்தை மறுபரிசீலனை செய்ய வேண்டும்' -சர்வதேச ஜூரர்கள்.

தற்போது கடுமையான முறையில் நடைமுறைப்படுத்தப்படும் பயங்கரவாதத் தடைச் சட்டத்தை மறுபரிசீலனை செய்ய வேண்டும் என சிறிலங்கா அரசாங்கத்தை சர்வதேச ஜூரர்கள் ஆணைக்குழு வேண்டுகோள் விடுத்துள்ளது.


இச்சட்டம் காரணமாக பலவந்தமாகக் காணாமல் போதல் அதிகரித்திருக்கின்றது எனவும் இவ்வாணைக்குழு தெரியப்படுத்தியிருக்கின்றது.

சிறிலங்கா நிலைமைகள் தொடர்பாக வெளியிட்டிருக்கும் அறிக்கை ஒன்றில் இதனைத் தெரிவித்திருக்கும் ஆணைக்குழு, பலவந்தமாக காணாமல் போதலிலிருந்து அனைவரையும் பாதுகாக்கும் சர்வதேசப் பிரகடனத்தில் சிறிலங்கா அரசாங்கத்தைக் கைச்சாத்திடுமாறு கேட்டுள்ளது. பயங்கரவாதத் தடைச் சட்டத்தில் மாற்றங்களைச் செய்யுமாறும் வேண்டுகோள் விடுத்துள்ளது.

சிறிலங்காவில் பலவந்தமாகக் காணாமல் போதலின் வரலாற்றை கருத்திற்கொள்ளும் போது காணாமல் போதலிலிருந்து அனைவரையும் பாதுகாக்கும் சட்டமூலத்தை ஏற்றுக்கொள்வது வரலாற்று முக்கியத்துவம் வாய்ந்த நடவடிக்கையாக அமையும் எனவும் அவ்வமைப்பு சுட்டிக்காட்டியிருக்கின்றது.

பலவந்தமாகக் காணாமல் போதல் என்ற கொடூரத்தை அரசாங்கம் ஏற்றுக்கொள்ளவில்லை என்ற செய்தியை இதன் மூலம் வெளிப்படுத்த முடியும் எனவும் ஆணைக்குழு தெரிவித்திருக்கின்றது.

நன்றி>புதினம்.